पाबि अहाँकेँ निखरि गेलौं
सबटा दु:ख बिसरि गेलौं
हँ मे हँ कहलौं तँ निक छी
नै कहलौं तँ उखरि गेलौं
जे बनेलक अहाँकेँ लोक
तकरे खा' क' पसरि गेलौं
खाँहिस छ'ल तँ केलौं प्रीति
मन भरिते ससरि गेलौं
कने जे ने आदर देलौं तँ
कपार पर चहरि गेलौं
एते ने झूठ स्वप्न देखेलौं
मनसँ अहाँ उतरि गेलौं
- विजय कुमार ठाकुर
आबै छी तँ फेरि जाउ नै
मानै छी बात जनाउ नै
हमरालें की की केलौं से
आंगुर पर गनाउ नै
हरेक पल केँ मोल छै
नेहोरा अछि लजाउ नै
जाति अपन भिन अछि
बात ई बीचमे लाउ नै
ल' लेत जान इन्तिहान
बेर - बेर अजमाउ नै
- विजय कुमार ठाकुर
निपल अंगना निपले रहलै
जरल मानस जरले रहलै
आस छ'ल जे चलि जेतै अखार
भिजल नएन भिजले रहलै
गछि क' नोत नै एलखिन नाह
काटल भालरि काटले रहलै
खइतौं एेँठ बढबितहुँ नेह
साजल सचार साजले रहलै
आब निक दिवस एतै कहिया
बारल जनता बारल रहलै
- विजय कुमार ठाकुर
कपारक लिखल मेटत के
नियति मे नहि त' भेटत के
दीनक स्वर्ग छै भीतक घर
ईंटा पर सँ ईंटा गेंटत के
अपने जखन भ' जेँ विमुख
छिड़िएल लागि समेटत के
ठेस जे लागल लोहू बहैए
आँचड़ केँ फाड़ि लपेटत के
अपन बुझि क खुशी केँ ठोप
दुखक जलधि मे फेँटत के
- विजय कुमार ठाकुर
मोनक बात कहल नै भेल
हाथ ओकर गहल नै भेल
कहिते रहलौं सच के सच
हवा के संग बहल नै भेल
इमानक हाथ नै छोड़लौं तेँ
भीतक घर महल नै भेल
भिन भेलौं गप मोनें रखितौं
दुख जे बात तहल नै भेल
साँस चलने कि हम जिन्दा छी
तोर बिछोह सहल नै भेल
- विजय कुमार ठाकुर
दुख कहियौ ककरा कान कहाँ छै
एहि पाथर में भगवान कहाँ छै
अछि डेग-डेग पर रावण ठाढ
आब राम आ धनुष बान कहाँ छै
सबके घराड़ी पर छै कोठे-कोठा
मुदा ककरो आब दलान कहाँ छै
निज के सब सँ पैघ बुझैत अछि
ओहि लोक के कहु सम्मान कहाँ छै
हम त मरि गेलौं कोना तोँ जिन्दा छेँ
ओ कहलक जीयै छी, जान कहाँ छै
मूल रचना - जावेद अख्तर
मैथिली अनुवाद - विजय कुमार ठाकुर
कोना कहु हम अहाँके, हमरा लेल अहाँ के छी
कोना कहु
कोना कहु हम अहाँके
अहाँ धड़कन के गीत छी, जीवन के अहाँ संगीत छी
अहाँ जनम, अहाँ भजन
अहाँ धवल, अहाँ नवल
अहाँ सबटा खुसी, अहाँ रति छी
अहाँ प्रीत छी, मनमीत छी
आँखि मे अहाँ, अखिआस मे अहाँ
नीन में अहाँ, स्वप्न में अहाँ
नोर में अहाँ, कहर में अहाँ
अहाँ हमर मन में, मति में
अहाँ दिन में, अहाँ राति में
अहाँ साँझ में, अहाँ भोर में
अहाँ काम में, अहाँ अटोर में
हमरा लेल पाएब अहीं
हमरा लेल चुकब अहीं
हमरा लेल हाँसब अहीं
हमरा लेल काँनब अहीं
आओर जागब सूतब अहीं
जाऊ कतउ देखु कतउ
अहाँ एतए अहाँ ओतए
कोना कहु हम अहाँके
अहाँ बिनु त हम किछु नैं छी
कोना कहु हम अहाँके, हमरा लेल अहाँ के छी
कोना कहु हम अहाँके
इ जे अहाँक रूप अछि
जिनगी के धूप अछि
चन्दन स साजल बदन
बहैत अछि ओहिमें एगो अगन
इ चमक आ इ धमक, अहाँके वायु स भेटल
केस मेंघ स भेटल
ठोर में कली खिल गेल
आँखि के झील मिल गेल
मुँखरा पर समटल चाँदनी
आवाज में अछि रागिनी
शीशा एहेन अंग अछि
फुल जेहेन रंग अछि
धार एहेन चाल अछि
की छटा अछि, की गाल अछि
इ बदन के रंग, जेना तितली हजार
आँचर के इ छाह, इ बाँहि के आकार
इ स्वप्न के नगर छै
कोना कहु हम अहँके, बिनु अहाँ इ जान जहर छै
कोना कहु हम अहाँके, हमरा लेल अहाँ के छी
कोना कहु हम अहाँके
हमरा लेल अहाँ धरम छी
अहीं विश्वास छी
अहीं पुजा छी हमर
अहीं खाँहिस छी हमर
अहीं आस छी
ताकै छी हम जेकरा हरेक क्षण, ओ अहाँ तस्वीर छी
अहीं हमर तकदीर छी
अहीं नक्षत्र छी हमर
अहीं गत्र छी हमर
जाल एना अहाँ फेरने छी
लागैए जेना अहाँ हमरा घेरने छी
पूरब में अहाँ, पक्ष्चिम में अहाँ
उत्तर में अहाँ, दक्षिण में अहाँ
हमर सकल जीवन में अहाँ
हमरा लेल धीर अहीं
हमरा लेल धेह अहीं
हमरा लेल सागर अहीं
हमरा लेल गागर अहीं
हम देखै बस अहाँके छी
हम सोचै बस अहाँके छी
हम मानै बस अहाँके छी
अहीं हमर पहचान छी
कोना कहु हम अहाँके
अहाँ देवी छी, अहाँ भगवान छी
कोना कहु हम अहाँके, हमरा लेल अहाँ के छी
कोना कहु......
-विजय कुमार ठाकुर
सहज छै त' फेरि संकोच किएक!!
बस पाँच दिनक बात छै
एतवे कहि क' ओ कात छै
सब रचना इश्वरक छै
फेरि छुआए किए गात छै
किछु रीति बाँकी छै औखन
जे नीक समाजले घात छै
सिंगरहार नैं भेल छुच्छ
त' बुझियौ नव परात छै
हमरा दूर करे' आहाँ सँ
ओ घर कपड़ा आ भात छै
- विजय कुमार ठाकुर
हम सपना नै देखबै आब कहिओ
अहाँके बाट नै हेरबै आब कहिओ
सुनर दिन एतै से आब भरोस नै
दीप आसक नै लेसबै आब कहिओ
बेटी के बिआह केलौं त भेल इ भान
अपन बेटा नै बेचबै आब कहिओ
निज गोड़ मे गड़ल त खेलौं शपथ
काँट सँ खेत नै बेढबै आब कहिओ
तीन टा शब्दके डर देखेतै जँ केओ
ओहि लोक के नै टेरबै आब कहिए
- विजय कुमार ठाकुर
छीन छरहर गोर छै
पानो सँ पातर ठोर छै
रौद में केसक छाहरि
वृष्टि में नाचैत मोर छै
टुस्सी सन सोटल नाक
नैन दुनू चित्तचोर छै
भीख में सम्मान मांगै छै
नान्हिए टा बच्चा कोर छै
नेहक निधान रहितो
आँखि में भरल नोर छै
- विजय कुमार ठाकुर
हम जपै छी अहाँके नाम
अहींके बुझै छी चारू धाम
हमराले त सोन अहाँ छी
अहाँ बुझि लिय बरू ताम
ओ की जानत दीनक दुख
जेकरा नहि बहलै घाम
जन्म जे देलैंन धरा पर
बेचलैंन वेँह द' क' दाम
प्रश्न नित हुनक एतबे
कहु ने कहिआ एबै गाम
- विजय कुमार ठाकुर
हम बतही छी जे आस करै छी
अहाँके उपर विश्वास करै छी
मोंनक बात सुनि करि भरोस
बेरि बेरि अहाँ निराश करै छी
इ मानल जे लिखल मेटत के
तैओ मेटबाले उपास करै छी
आढि छँटबा में बितल जीवन
आब गंगा कात में मास करै छी
हम की केलौं नैं देखलौं कहिओ
आन उपर उपहास करै छी
हमराले छै वेँह भीतक घर
अहाँ कहु कतए वास करै छी
- विजय कुमार ठाकुर
बाट ताकै छी औखन
खूब कानै छी औखन
अहाँके पहिराबै लेँ
हार गाँथै छी औखन
विधि स' बान्हल छी
टेमी दागै छी औखन
इआद क' अतीत के
नित झाँखै छी औखन
अहाँ त्यागि गेलौं ई
बात झाँपै छी औखन
- विजय कुमार ठाकुर
हकासल रहलौं आजीवन
पिआसल रहलौं आजीवन
नै बारह नै चौदह बरख
निर्वासल रहलौं आजीवन
हम निक दिनक भरोस में
खबासल रहलौं आजीवन
सुनि क मोनक बात हुनक
उपासल रहलौं आजीवन
ठाढ केलौं जकरा ओकरे स
एँड़ासल रहलौं आजीवन
- विजय कुमार ठाकुर
बाट तकैत रहलौं आजीवन
अहाँ ठकैत रहलौं आजीवन
ई अन्तिम छै इएह बिचारि'क
दुख सहैत रहलौं आजीवन
अपन लेल सदत चालनि में
पानि भरैत रहलौं आजीवन
कागक भाखा सुनि'क अंगनामें
आस करैत रहलौं आजीवन
आन बुझत त' करत चौल तेँ
नोर पोछैत रहलौं आजीवन
- विजय कुमार ठाकुर
ओ बतही भीख में मान मांगै छै
हमरा स' प्रेमक दान मांगै छै
ओ इआद क अतीत के अपन
बाबा पोखैर के मखान मांंगै छै
साड़ी छै गुदरी तैओ पसारि क
खोँछि में ओ दुइभ धान मांगै छै
चान सन पूत के मुँह हेरि क
सिँउथि में सिंदुरदान मांगै छै
कुरीतिक तरुआरि स काटल
ओ अपन नाक-कान मांगै छै
- विजय कुमार ठाकुर
