मोनक बात कहल नै भेल
हाथ ओकर गहल नै भेल
कहिते रहलौं सच के सच
हवा के संग बहल नै भेल
इमानक हाथ नै छोड़लौं तेँ
भीतक घर महल नै भेल
भिन भेलौं गप मोनें रखितौं
दुख जे बात तहल नै भेल
साँस चलने कि हम जिन्दा छी
तोर बिछोह सहल नै भेल
- विजय कुमार ठाकुर
दुख कहियौ ककरा कान कहाँ छै
एहि पाथर में भगवान कहाँ छै
अछि डेग-डेग पर रावण ठाढ
आब राम आ धनुष बान कहाँ छै
सबके घराड़ी पर छै कोठे-कोठा
मुदा ककरो आब दलान कहाँ छै
निज के सब सँ पैघ बुझैत अछि
ओहि लोक के कहु सम्मान कहाँ छै
हम त मरि गेलौं कोना तोँ जिन्दा छेँ
ओ कहलक जीयै छी, जान कहाँ छै
